Nan anpil pawòl moun di lè yon moun mouri, lespri li pa disparèt : li tounen yon lwa, li pran plas pami lespri ki gide vivan yo. Men, sa se sèlman yon pati nan verite a, paske bagay la pi pwofon pase sa.
Lè yon moun viv sou tè a, gen yon eleman nan li ki depase tout limit matyè : se nanm lan. Nanm lan, se pa yon senp souf ki fè kò a bouje ; se yon ti flanm ki soti nan Bondye menm. Se yon pati nan li ki chwazi pran fòm imen pou fè yon eksperyans nan lavi. Lè eksperyans sa a fini, li pa mouri, li pa sispann egziste. Li lib pou ale kote li vle : pafwa li monte nan lòt plan, pafwa li reyalize yon lòt misyon, pafwa li antre nan yon lòt fòm egzistans.
Sa pa vle di, chak fwa yon moun mouri lespri li vin tounen lwa. Gen nanm ki chwazi rete nan gwo lanmè enèji a, gen lòt ki vin yon gid pou fanmi yo, epi gen kèk ki, avèk volonte ak vokasyon, rantre nan zòn lwa yo pou sèvi kòm entèmedyè ant moun ak fòs ki pi wo. Menm lè sa rive, sa pa vle di se « lespri mò a »nan sans òdinè : se yon pati diven ki kontinye egziste, epi ki chwazi sèvi nan yon lòt nivo.
Tout sa ki vivan, kit nou wè yo ak je nou, kit yo envizib, genyen lavi a k ap sikile ladan yo pou yon tan. Lè tan sa a fini, lavi a retounen nan sous li, epi li ka deside pran yon lòt direksyon. Se sa k fè, nan tradisyon nou yo, lwa yo pa janm senpleman « mò » : yo se fòs vivan, entèlijans enèjik, ki kontinye evolye atravè letan ak lespas.
