Nan sosyete nou isit, relasyon fi ak gason ki rete pami youn nan gwo sijè tabou, gen anpil ti detay ki fè anpil gwo eskandal e ki menm parèt banal si yon moun oze. Nan sijè tabou nou pou jodi a, n ap abòde ansanm sa ki deranje pou yon gason al achte kotèks (sèvyèt ijyenik pou madanm oubyen mennaj li?
« Mwen te deside fè sa yon jou malgre m te santi m jennen koz m konnen anpil moun ki wè m ka twouve sa banal. Mwen te ale nan yon makèt epi m fè acha yon kantite pou mennaj mwen. Pandan m ap pran yo, yon patnè k ap pase wè m epi l tonbe ri. Mwen ri pou voye wont ale malgre m jennen. E lè m te rive sou kès la tou, moun yo t ap gade m menm jan ak kesyè a ki gade m li souri anba anba », se sa yon jèn gason 25 lane rakonte ki di l te twouve se pi bèl jès pou li pou jan mennaj li te kontan jou sa.
« Mwen m twouve sa pa banal e se yon jès ki montre m vrèman alèz nan relasyon m ye a. M pa gen konplèks sou anyen, m santi m se yon mari responsab san m poko marye », fè konprann jèn gason sa.
Gen anpil lòt jès tou anpil moun ka wè ki jenan e sosyete a ka jije w sou li lè w nan yon relasyon, tankou achte kilòt ak soutyen, lave kilòt madanm ou e menm fè mache pou li elatriye. Ou menm k ap li, kisa w ka di sou jès sa si yon gason fè l pou mennaj li oubyen madanm li?
