Gen pèp ki gen drapo yo resevwa ak lapè, gen lòt ki jwenn pa yo atravè batay. Nou menm Ayisyen, drapo nou se rezilta yon rebelyon istorik, yon leve kanpe kont esklavaj, kont imilyasyon, kont tout sa ki te vle fè nou pèdi diyite nou. Drapo ble ak wouj sa a, se pa yon senp moso twal. Se memwa nou. Se temwayaj lit zansèt nou. Se senbòl libète nou.
Lè yon Ayisyen leve zye l sou drapo a, se tout listwa pèp sa a ki parèt. Se Desalin ki pa t aksepte chenn. Se Catherine Flon ki koud li ak respè. Se brav gason ak fanm ki te mete lavi yo an danje pou Ayiti te ka kanpe dwat. Drapo sa a pa fèt pou dekore miray. Li fèt pou leve konsyans. Li se fwi sakrifis, li se fyète nasyonal.
Nan tout kwen peyi a, li merite respe. Chak fwa li flote, se yon apèl li lanse bay tout Ayisyen pou yo sonje kiyès yo ye. Se pa lè fèt drapo sèlman pou nou montre lanmou nou pou li. Se chak jou, chak moman, kote nou ye, pou nou kenbe tèt nou dwat kòm pitit tè sa a. Drapo a pa fè pati yon rejyon, li pa pou yon klas sosyal. Li se inite nou. Li se sa ki rasanble nou kòm pèp.
Pandan anpil lòt peyi ap chèche idantite, nou menm nou gen pa nou ki te koule ak san. Lè w mete drapo a sou ou, se pa yon mòd w ap swiv, se eritaj ou w ap onore. Fòk nou aprann jèn yo respekte drapo se respekte tèt yo. Lè yon timoun aprann leve kanpe lè l tande im nasyonal la, lè l aprann pa jete drapo a atè, lè l aprann pale de li ak kè, se yon Ayisyen konsyan l ap vin ye.
Genyen ki gen tan bliye, genyen ki pa janm aprann. Men li pa janm twò ta. Se devwa chak granmoun pou pase flanm lan bay jenerasyon k ap monte. Paske se drapo sa a ki raple nou nou se pèp k ap lite, pèp k ap kanpe, pèp ki gen valè. Fyète pou drapo nou, se fyète pou peyi nou. Drapo nou se fòs nou. Pa meprize li, pa bliye li. Sonje, lè tout bagay sanble fini, se sou drapo sa a lespwa nasyon an ka rekòmanse.
