Nan anpil relasyon, maryaj parèt tankou yon enstitisyon ki fèt pou bay estabilite, lanmou ak konfyans. Men, dèyè imaj sa a, genyen yon seri pwoblèm ki souvan kache, espesyalman sa ki gen rapò ak entimite nan kabann. Nan sosyete nou, pale de sa toujou konsidere kòm yon gwo tabou. Se konsa anpil koup ap soufri an silans, san yo pa janm jwenn espas pou libere pawòl yo.
Verite a lavi entim nan yon koup se youn nan poto mitan relasyon an. Lè bagay yo pa mache, fristrasyon ak distans emosyonèl pran plas. Gen moun ki kwè li pi bon fèmen bouch yo, swa pou yo pa fè wont, swa paske yo panse se yon bagay ki pa dwe diskite. Rezilta a se soufrans anndan, malantandi, e pafwa menm separasyon.
Nan anpil ka, pwoblèm yo senp, tankou mank dyalòg, estrès, oubyen twòp fatig nan travay konn retire dezi. Gen lòt fwa yo pi konplike, tankou pwoblèm sante, diferans nan bezwen seksyèl, oubyen absans atansyon emosyonèl. Tout sa yo se bagay ki ta ka jwenn solisyon, si sèlman koup yo te gen kouraj pale youn ak lòt san wont.
Maryaj se yon espas konfyans. Si moun ki marye yo pa ka pale sou sa ki pi entim, kiyès ki ka tande yo? Se nan dyalòg, nan respè ak nan ouvèti lespri, koup yo jwenn chemen pou rebalanse relasyon an. Olye kite tabou fè silans anvayi lavi yo, li enpòtan pou yo chèche fason pou pale, pou koute, e si sa nesesè, jwenn èd pwofesyonèl.
Pale sou entimite se pa yon feblès, se yon siy matirite. Se montre relasyon an gen ase valè pou chèche konprann epi amelyore l. Tabou a ap kontinye egziste, men koup ki gen kouraj pou kraze baryè sa a ap dekouvri yon verite senp : lavi maryaj pi bèl lè pa gen sekrè nan kabann.
