Nan chak fanmi, gen ti bagay ki fè tout diferans. Gen mo ki sanble senp, men ki pote yon valè moral ak sosyal anpil fwa pi gwo pase sa nou imajine. Se ka mo tankou bonjou, bonswa, mèsi, silvouplè, padon. Mo sa yo pa sèlman sèvi pou kominike—yo bati pon, yo mete respè kote li merite, epi yo ede pitit nou devlope yon sans de viv ansanm ki solid.
Politesse pa sote soti nan syèl. Li aprann, li pratike, li transmèt. Epi li pi souvan ap soti lakay, nan fanmi, kote timoun fè premye pa yo nan lavi sosyal la. Lè nou menm kòm paran pran tan pou montre pitit nou yo kijan pou yo salye lòt moun, kijan pou yo di mèsi lè yo resevwa yon sèvis oswa yon kado, kijan pou yo di padon lè yo fè yon erè, nou pa sèlman aprann yo bel mannyè, nou mete fondasyon pou lavi sosyal yo pi djanm.
Anpil moun panse politès se yon fòm ipokrizi oubyen se zouti moun rich yo pou kontwole lòt. Men an reyalite, politès se yon zouti komen tout moun ka itilize pou egziste an amoni ak lòt. Li fè moun santi yo wè, respekte, e li chita baz pou konfyans.
Se pa ase di timoun: “Di bonjou!”, “Di mèsi!” Se ak egzanp nou, ak modèl nou mete chak jou, yo aprann. Si ou leve maten, ou di bonjou ak chalè, si ou di mèsi pou ti jefò yo fè, si ou itilize padon lè ou menm ou fè yon ti erè, timoun lan ap suiv. Se pa yon leson ki pase nan tèt sèlman, li pase nan kè tou.
Epi sa mande pasyans. Paske timoun pa aprann tout bagay yon sèl kou. Gen fwa yo bliye, gen fwa yo fè move jan. Men si nou kontinye, san menas, san wont, men ak lanmou ak konsistans, yo va kenbe sa nan kè yo kòm valè. Yo va rive yon jou sèvi ak mo sa yo natirèlman, san yo pa oblije reflechi, paske li va vin tounen yon pati nan yo.
Nan anpil fanmi ayisyen, gen tradisyon nou renmen sonje: manje dimanch an fanmi, chante pandan n ap netwaye, rasanble pou fèt oswa pou priyè. Se pou politesse—bonjou, mèsi, padon—vin tounen yon tradisyon tou. Yon bagay nou pase soti jenerasyon an jenerasyon, menm jan nou pase resèt diri kole, istwa granparan, oubyen lapriyè anvan dòmi.
Politès pa diminye timoun, li grandi yo. Li pa fè yo san fòs, li bay yo kapasite pou yo adapte, pou yo kominike, pou yo viv nan respè tèt yo ak respè lòt. Se pi bèl kado nou ka bay yo.
Yon Kesyon pou ou, Paran
Èske ou montre pitit ou di: bonjou, mèsi, silvouplè, padon?
Paske plis pase yon tradisyon, se fondasyon pou lavi sosyal yo. Se yon eritaj ki pa koute lajan, men ki ka chanje lavi.
