Kòman moun pran lwa ?

Gen moun ki panse “pran lwa” se yon bagay majik. Men, an reyalite, li pi pwofon, pi senp, epi pi mistik pase sa. Lè yon moun “pran lwa”, se pa sèlman yon moman espirityèl : se yon rankont ant de frekans, ant de fòs ki rive vin ann amoni.

Lè ou ap lapriyè, medite, oswa chante, gen yon moman kote lespri ou lage tout baryè. Se lè sa, ou vin “sou frekans lwa a”, menm jan yon radyo rive byen ajiste sou yon estasyon. Nan moman sa, lwa a pase sou ou, li itilize kò ou kòm vwa, kòm enstriman. Ou santi yon chalè, yon frison, yon mouvman andedan ou : se pa ou sèlman ankò, se yon lòt fòs k ap travèse w.

Men, pa tout moun ki kapab pran lwa. Gen moun ki toujou rete sou limit la : yo santi yon ti briz, yon ti frison, men yo pa janm “ouvè” ase pou resevwa fòs la. Gen lòt, okontrè, ki fasil vin ann amoni pandan dans, pandan tanbou ak chante leve nan lakou a ; lè kominote a vin ini nan menm frekans lan, lwa a ka desann, epi tout moun santi li pase. Lè sa a, fòs la se pa yon sèl moun li touche, men yon kolektivite antye.

Se vre, lè lwa pase sou ou, si ou pa antrene, ou ka pèdi kontwòl. Kò a souke, vwa chanje, ou santi yon pouvwa k ap travèse w. Se pou sa nan tradisyon vodou, moun pa “pran lwa” konsa ; yo aprann, yo suiv chemen, yo respekte disiplin. Paske menm jan ak elektrisite, fòs lwa a pa pou jwe.

Epi, nan tout sa, fòk nou fè atansyon : gen moun k ap fè estera,teyat, imitasyon, chalatann. Yo sèvi ak pawòl lwa, men se pa lwa k ap pale nan yo. Se pou sa, moun ki konnen vrèman konnen fè diferans ant lespri ki desann epi lespri jwèt.

Pran lwa, se pa yon jwèt : se yon amoni, yon rankont ant mond vizib ak envizib, kote kè, kò, ak lespri vin tounen yon sèl frekans