Poukisa yo di vodou touye anpil moun ?

Vodou se yon bagay anpil moun pa konprann, e anpil toujou pè menm eseye aprann li. Se konsa anpil lide fèb ak pawòl san fondman gaye sou do li. Lè yon moun tonbe mal oswa mouri nan yon fason ki pa klè, premye pawòl k ap sikile se : « se vodou ki touye l ! » Men èske sa vre ? Oswa èske se paske moun pa vle chèche konprann sa k ap pase vre ?

Nan peyi nou, Ayiti, lè lapolis sispèk gen vodou nan yon zak, yo souvan sispann ankèt la. Sa vin tounen yon eskiz pou kite bagay pase. Lè krim fèt, vòl, oswa zak mechanste, gen moun ki kache dèyè pawòl « se vodou ». Men reyalite a se pa vodou ki fè moun mechan, se move kè moun. Si lapolis te gen yon brigad espesyal ki metrize vodou, moun pa t ap ka fè sa fasil konsa pou twonpe sosyete a.

Gen moun ki, paske yo pa vle travay oswa paske yo echwe nan lavi, sèvi ak vodou kòm eskiz : « lwa ap peze m », yo di. E gen lòt ki fè mechanste epi kache dèyè « se lwa k ap ban mwen fòs ». Men se pa vodou ki mande mechanste ; se lespri moun ki fè chwa sèvi li pou move rezon.

An reyalite, vodou pa touye moun — se moun ki sèvi li mal. Nan vodou gen lwa ki pwoteje lavi, ki pote gerizon, ki ede tout moun mache byen sou chimen yo. Men si yon moun ap fè move bagay ki deranje ekilib lanati, lavi menm ka retire li. Sa pa vle di vodou touye moun, men se yon kesyon ekilib nan linivè.

Vodou se yon chemen espirityèl ki baze sou respè, lanati, ak lanmou pou lavi. Men, chokante, moun kontinye sèvi li pou kache mechanste, kidonk yo toujou ap repete : « vodou touye moun ». Se pa vodou ki touye, se manti, prejije ak enyorans k ap touye verite a.